Quem cavat assiduis sudibus, scutoque lacessit, Atque omnes implet numeros, dignissima prorsus Florali matrona tubâ; nisi si quid in illo Pectore plus agitat, veræque paratur arenæ. Quem præstare potest mulier galeata pudorem, Quæ fugit a sexu? vires amat. Hæc tamen ipsa Vir nollet fieri: nam quantula nostra voluptas? Quale decus rerum, si conjugis auctio fiat? Balteus, et manicæ, et crista, crurisque sinistri Dimidium tegimen ; vel, si diversa movebit Prœlia, tu felix, ocreas vendente puellâ. Hæ sunt, quæ tenui sudant in cyclade, quarum Delicias et panniculus bombycinus urit. Adspice, quo fremitu monstratos perferat ictus, Et quanto galeæ curvetur pondere, quanta Poplitibus sedeat, quàm denso fascia libro, Et ride, scaphium positis quum sumitur armis. Dicite vos, neptes Lepidi, cæcive Metelli, Gurgitis aut Fabii, quæ ludia sumpserit unquam Hos habitus? quando ad palum gemat uxor Asyli? Semper habet lites alternaque jurgia lectus, In quo nupta jacet: minimùm dormitur in illo. Tunc gravis illa viro, tunc orbâ tigride pejor. Quum simulat gemitus occulti conscia facti, Aut odit pueros, aut fictâ pellice plorat, Uberibus semper lacrymis, semperque paratis In statione suâ, atque exspectantibus illam, Quo jubeat manare modo: tu credis amorem, Tu tibi tunc curruca places, fletumque labellis Exsorbes, quæ scripta et quot lecture tabellas, Si tibi zelotype retegantur scrinia macha! Sed jacet in servi complexibus, aut equitis. Dic, Dic aliquem, sodes, hîc, Quintiliane, colorem : Hæremus dic ipsa. Olim convenerat, inquit, Ut faceres tu, quod velles, nec non ego possem Indulgere mihi: clames licèt, et mare cœlo Confundas, homo sum. Nihil est audacius illis Deprênsis: iram atque animos a crimine sumunt.
Unde hæc monstra tamen, vel quo de fonte, requiris ?
Nunc patimur longæ pacis mala. Sævior armis Luxuria incubuit, victumque ulciscitur orbem. Nullum crimen abest, facinusque libidinis, ex quo Paupertas Romana perît. Hinc fluxit ad istos Et Sybaris colles, hinc et Rhodos, et Miletos,
Atque coronatum et petulans madidumque Tarentum. Prima peregrinos obscœna Pecunia mores Intulit, et turpi fregerunt sæcula luxu
Divitiæ molles. Quid enim Venus ebria curat ?— Ut spectet ludos, conducit Ogulnia vestem,
Conducit comites, sellam, cervical, amicas,
Nutricem; et flavam, cui det mandata, puellam.
Hæc tamen argenti superest quodcunque paterni
Levibus athletis, ac vasa novissima donat.
Multis res angusta domi: sed nulla pudorem
Paupertatis habet, nec se metitur ad illum,
Quem dedit hæc posuitque, modum. Tamen utile quid sit
Prospiciunt aliquando viri; frigusque famemque
Formicâ tandem quidam expavêre magistrâ. Prodiga non sentit pereuntem fœmina censum, Ac, velut exhaustâ recidivus pullulet arcâ Nummus et e pleno semper tollatur acervo, Non unquam reputat, quanti sibi gaudia constent. Si gaudet cantu; nullius fibula durat Vocem vendentis prætoribus: organa semper In manibus: densi radiant testudine totâ
Sardonyches crispo numerantur pectine chordæ,
Quo tener Hedymeles operas dedit: hunc tenet, hoc se
Solatur, gratoque indulget basia plectro.
Quædam de numero Lamiarum ac nominis alti
Cum farre et vino Janum Vestamque rogabat, An Capitolinam deberet Pollio quercum
Sperare, et fidibus promittere. Quid faceret plus Ægrotante viro? medicis quid tristibus erga Filiolum? Stetit ante aram, nec turpe putavit Pro citharâ velare caput; dictataque verba Pertulit, ut mos est, et apertâ palluit agnâ. Dic mihi nunc, quæso, dic, antiquissime divûm, Respondes his, Jane pater? Magna otia cœli : Non est, ut video, non est, quod agatur apud vos. Hæc de comœdis te consulit: illa tragœdum Commendare volet: varicosus fiet haruspex.
Sed cantet potiùs, quàm totam pervolet urbem Audax, et cœtus possit quàm ferre virorum,
Cumque paludatis ducibus, præsente marito, Ipsa loqui rectâ facie strictisque mamillis. Hæc eadem novit, quid toto fiat in orbe; Quid Seres, quid Thraces agant: secreta noverca Et pueri quis amet, quis diripiatur adulter.- Instantem regi Armenio Parthoque cometen Prima videt; famam rumoresque illa recentes Excipit ad portas: quosdam facit. Isse Niphatem In populos, magnoque illîc cuncta arva teneri Diluvio, nutare urbes, subsidere terras,
Quocunque in trivio, cuicunque est obvia, narrat.
Nec tamen id vitium magis intolerabile, quàm quòd
Vicinos humiles rapere et concidere loris
Exorata solet. Nam si latratibus alti
Rumpuntur somni; Fustes huc ociùs, inquit, Afferte, atque illis dominum jubet antè feriri, Deinde canem. Gravis occursu, teterrima vultu, Balnea nocte subit; conchas et castra moveri Nocte jubet; magno gaudet sudare tumultu, Quum lassata gravi ceciderunt brachia massâ.- Convivæ miseri interea somnoque fameque
Urguentur. Tandem illa venit rubicundula, totum
Enophorum sitiens, plenâ quod tenditur urnâ Admotum pedibus, de quo sextarius alter
Ducitur ante cibum, rabidam facturus orexim. Dum redit et loto terram ferit intestino, Marmoribus rivi properant, aut lata Falernum Pelvis olet nam sic, tanquam alta in dolia longus Deciderit serpens, bibit et vomit. Ergò maritus Nauseat, atque oculis bilem substringit opertis.
Illa tamen gravior, quæ, quum discumbere cœpit, Laudat Virgilium, perituræ ignoscit Elissæ, Committit vates et comparat; inde Maronem, Atque aliâ parte in trutinâ suspendit Homerum. Cedunt grammatici, vincuntur rhetores, omnis Turba tacet; nec causidicus, nec præco loquatur, Altera nec mulier; verborum tanta cadit vis, Tot pariter pelves, tot tintinnabula dicas Pulsari. Jam nemo tubas, nemo æra fatiget : Una laboranti poterit succurrere lunæ.
Imponit finem sapiens et rebus honestis. Nam quæ docta nimis cupit et facunda videri, Crure tenus medio tunicas, succingere debet, Cædere Silvano porcum, quadrante lavari.
Non habeat matrona, tibi quæ juncta recumbit, Dicendi genus, aut curtum sermone rotato Torqueat enthymema, nec historias sciat omnes; Sed quædam ex libris et non intelligat. Odi
Hanc ego, quæ repetit volvitque Palæmonis artem, Servatâ semper lege et ratione loquendi, Ignotosque mihi tenet antiquaria versus, Nec curanda viris opicæ castigat amicæ Verba. Solecismum liceat fecisse marito.
Nil non permittit mulier sibi, turpe putat nil, Quum virides gemmas collo circumdedit, et quum Auribus extentis magnos commisit elenchos. Intolerabilius nihil est, quàm fœmina dives.
Interea fœda aspectu ridendaque multo Pane tumet facies, aut pinguia Poppæana Spirat, et hinc miseri viscantur labra mariti. Ad machum veniet lotâ cute. Quando videri Vult formosa domi? machis foliata parantur. His emitur, quidquid graciles huc mittitis Indi. Tandem aperit vultum, et tectoria prima reponit: Incipit agnosci, atque illo lacte fovetur, Propter quod secum comites educit asellas, Exsul Hyperboreum si dimittatur ad axem. Sed quæ mutatis inducitur atque fovetur Tot medicaminibus, coctæque siliginis offas Accipit et madidæ, facies dicetur, an ulcus?
Est pretium curæ, penitùs cognoscere, toto Quid faciant agitentque die. Si nocte maritus Aversus jacuit; periit libraria, ponunt Cosmetæ tunicas, tardè venisse Liburnus
Dicitur, et pœnas alieni pendere somni
Cogitur hic frangit ferulas, rubet ille flagellis,
Hic scuticâ sunt, quæ tortoribus annua præstent.
Verberat, atque obiter faciem linit; audit amicas, Aut latum pictæ vestis considerat aurum, Et cædit; longi relegit transversa diurni, Et cædit, donec lassis cædentibus, EXI Intonet horrendum, jam cognitione peractâ.
Præfectura domûs Siculâ non mitior aulâ. Nam si constituit solitoque decentiùs optat Ornari, et properat, jamque exspectatur in hortis, Aut apud Isiacæ potiùs sacraria lenæ ; Disponit crinem laceratis ipsa capillis
Nuda humero Psecas infelix, nudisque mamillis.
Altior hic quare cincinnus? Taurea punit
Continuò flexi crimen facinusque capilli.
Quid Psecas admisit? quænam est hîc culpa puellæ,
Si tibi displicuit nasus tuus? Altera lævum
Extendit, pectitque comas, et volvit in orbem. Est in consilio matrona admotaque lanis Emeritâ quæ cessat acu: sententia prima Hujus erit; post hanc ætate atque arte minores Censebunt, tanquam famæ discrimen agatur Aut animæ tanta est quærendi cura decoris. Tot premit ordinibus, tot adhuc compagibus altum Edificat caput. Andromachen a fronte videbis: Post minor est: credas aliam. Cedo, si breve parvi Sortita est lateris spatium, breviorque videtur Virgine Pygmæâ, nullis adjuta cothurnis, Et levis erectâ consurgit ad oscula plantâ ? Nulla viri cura interea, nec mentio fiet Damnorum: vivit tanquam vicina marito. Hoc solo propior, quòd amicos conjugis odit Et servos, gravis est rationibus. Ecce furentis Bellonæ matrisque deûm chorus intrat, et ingens Semivir,-
-cui rauca cohors, cui tympana cedunt Plebeia, et Phrygiâ vestitur bucca tiarâ.
Grande sonat, metuique jubet Septembris et Austri
Adventum, nisi se centum lustraverit ovis,
Et xerampelinas veteres donaverit ipsi,
Ut, quidquid subiti et magni discriminis instat,
In tunicas eat, et totum semel expiet annum. Hibernum fractâ glacie descendet in amnem, Ter matutino Tiberi mergetur, et ipsis
Vorticibus timidum caput abluet: inde Superbi
Totum regis agrum nuda ac tremebunda cruentis
Erepet genibus. Si candida jusserit Io,
Ibit ad Ægypti finem, calidâque petitas
A Meroë portabit aquas, ut spargat in ædem
Isidis, antiquo quæ proxima surgit ovili.
Credit enim ipsius dominæ se voce moneri.
En animam et mentem, cum quâ dî nocte loquantur!
Ergò hic præcipuum summumque meretur honorem,
Qui grege linigero circumdatus, et grege calvo
Plangentis populi currit derisor Anubis.
Ille petit veniam, quoties non abstinet uxor Concubitu sacris observandisque diebus ;
« PredošláPokračovať » |