Hinc jejunum odium. Sed jurgia prima sonare Incipiunt animis ardentibus: hæc tuba rixæ. Dein clamore pari concurritur, et vice teli Sævit nuda manus: paucæ sine vulnere malæ : Vix cuiquam aut nulli, toto certamine nasus Integer. Adspiceres jam cuncta per agmina vultus Dimidios, alias facies, et hiantia ruptis
Ossa genis, plenos oculorum sanguine pugnos.
Ludere se credunt ipsi tamen, et pueriles
Exercere acies, quòd nulla cadavera calcent,
Et sanè quò tot rixantis millia turbæ,
Si vivunt omnes? Ergò acrior impetus, et jam
Saxa inclinatis per humum quæsita lacertis
Incipiunt torquere, domestica seditioni
Tela; nec hunc lapidem, quales et Turnus, et Ajax,
Vel quo Tydides percussit pondere coxam
Æneæ; sed quem valeant emittere dextræ, Illis dissimiles et nostro tempore natæ. Nam genus hoc vivo jam decrescebat Homero. Terra malos homines nunc educat atque pusillos. Ergò deus, quicunque adspexit, ridet, et odit.
A deverticulo repetatur fabula. Postquam Subsidiis aucti, pars altera promere ferrum Audet, et infestis pugnam instaurare sagittis ; Terga fugæ celeri præstantibus omnibus instant, Qui vicina colunt umbrose Tentyra palmæ. Labitur hinc quidam, nimiâ formidine cursum Præcipitans, capiturque: ast illum in plurima sectum Frusta et particulas, ut multis mortuus unus Sufficeret, totum corrosis ossibus edit Victrix turba: nec ardenti decoxit aëno,
Aut verubus; longum usque adeò tardumque putavit Exspectare focos, contenta cadavere crudo. Hîc, gaudere libet, quòd non violaverit ignem, Quem summâ cœli raptum de parte Prometheus Donavit terris. Elemento gratulor, et te Exsultare reor. Sed qui mordere cadaver Sustinuit, nil unquam hâc carne libentiùs edit. Nam scelere in tanto ne quæras, et dubites, an Prima voluptatem gula senserit. Ultimus autem, Qui stetit absumpto jam toto corpore, ductis Per terram digitis, aliquid de sanguine gustat. Vascones, hæc fama est, alimentis talibus olim Produxêre animas: sed res diversa, sed illîc
Fortunæ invidia est bellorumque ultima, casus Extremi, longæ dira obsidionis egestas. Hujus enim, quod nunc agitur, miserabile debet Exemplum esse cibi: sicut modò dicta mihi gens Post omnes herbas, post cuncta animalia, quidquid Cogebat vacui ventris furor, hostibus ipsis Pallorem, ac maciem, et tenues miserantibus artus, Membra aliena fame lacerabant, esse parati
Quisnam hominum veniam dare, quisve deorum
Viribus abnuerit dira atque immania passis, Et quibus illorum poterant ignoscere manes, Quorum corporibus vescebantur?
Zenonis præcepta monent: nec enim omnia, quædam Pro vitâ facienda putat. Sed Cantaber unde Stoïcus, antiqui præsertim ætate Metelli?
Nunc totus Graias nostrasque habet orbis Athenas. Gallia causidicos docuit facunda Britannos: De conducendo loquitur jam rhetore Thule. Nobilis ille tamen populus, quem diximus; et par Virtute atque fide, sed major clade Saguntus Tale quid excusat. Mæotide sævior arâ Egyptus. Quippe illa nefandi Taurica sacri Inventrix homines (ut jam, quæ carmina tradunt, Digna fide credas) tantùm immolat, ulterius nil
Aut gravius cultro timet hostia. Qui modò casus Impulit hos? quæ tanta fames, infestaque vallo Arma coëgerunt tam detestabile monstrum
Audere? Anne aliam, terrâ Memphitide siccâ, Invidiam facerent nolenti surgere Nilo?
Quâ nec terribiles Cimbri, nec Britones unquam,
Sauromatæve truces, aut inmanes Agathyrsi,
Hâc sævit rabie imbelle et inutile vulgus, Parvula fictilibus solitum dare vela phaselis, Et brevibus pictæ remis incumbere testa.
Nec pœnam sceleri invenies, nec digna parabis Supplicia his populis, in quorum mente pares sunt Et similes ira atque fames.
Quæ lacrymas dedit: hæc nostri pars optima sensûs.
Humano generi dare se natura fatetur,
Plorare ergò jubet casum lugentis amici,
Squaloremque rei, pupillum ad jura vocantem
Circumscriptorem, cujus manantia fletu Ora puellares faciunt incerta capilli.
Naturæ imperio gemimus, quum funus adultæ
Virginis occurrit, vel terrâ clauditur infans,
Et minor igne rogi. Quis enim bonus et face dignus Arcanâ, qualem Cereris vult esse sacerdos, Ulla aliena sibi credat mala? Separat hoc nos
A grege mutorum, atque ideo venerabile soli Sortiti ingenium, divinorumque capaces, Atque exercendis capiendisque artibus apti, Sensum a cœlesti demissum traximus arce,
Cujus egent prona et terram spectantia. Mundi
Principio indulsit communis conditor illis
Tantùm animas, nobis animum quoque, mutuus ut nos
Affectus petere auxilium et præstare juberet,
Dispersos trahere in populum, migrare vetusto
De nemore, et proavis habitatas linquere silvas Ædificare domos, Laribus conjungere nostris Tectum aliud, tutos vicino limine somnos Ut collata daret fiducia; protegere armis Lapsum aut ingenti nutantem vulnere civem, Communi dare signa tubâ, defendier îsdem Turribus, atque unâ portarum clave teneri. Sed jam serpentum major concordia. Parcit Cognatis maculis similis fera. Quando leoni Fortior eripuit vitam leo? quo nemore unquam Exspiravit aper majoris dentibus apri? Indica tigris agit rabidâ cum tigride pacem Perpetuam sævis inter se convenit ursis.
Ast homini ferrum letale incude nefandâ
Produxisse parum est; quum rastra et sarcula tantùm
Assueti coquere, et marris ac vomere lassi
Nescierint primi gladios extundere fabri.
Adspicimus populos, quorum non sufficit iræ
Occidisse aliquem; sed pectora, brachia, vultum Crediderint genus esse cibi. Quid diceret ergò, Vel quò non fugeret, si nunc hæc monstra videret Pythagoras, cunctis animalibus abstinuit qui
Tanquam homine, et ventri indulsit non omne legumen?
Quis numerare queat felicis præmia, Galle, Militia? Nam si subeuntur prospera castra, Me pavidum excipiat tironem porta secundo
Sidere. Plus etenim fati valet hora benigni, Quàm si nos Veneris commendet epistola Marti, Et Samiâ genitrix quæ delectatur arenâ.
Commoda tractemus primùm communia, quorum Haud minimum illud erit, ne te pulsare togatus Audeat ; immo, etsi pulsetur, dissimulet, nec Audeat excussos Prætori ostendere dentes, Et nigram in facie tumidis livoribus offam, Atque oculum medico nil promittente relictum. Bardaïcus judex datur hæc punire volenti Calceus, et grandes magna ad subsellia suræ, Legibus antiquis castrorum et more Camilli Servato, miles ne vallum litiget extra
Et procul a signis. Justissima Centurionum Cognitio est igitur de milite; nec mihi deerit Ultio, si justæ defertur causa querelæ.
Tota cohors tamen est inimica, omnesque manipli
Consensu magno efficiunt, curabilis ut sit
Vindicta et gravior, quàm injuria. Dignum erit ergò Declamatoris mulino corde Vagellî,
Quum duo crura habeas, offendere tot caligas, tot Millia clavorum. Quis tam procul absit ab Urbe ? Præterea quis tam Pylades, molem aggeris ultra Ut veniat? lacrymæ siccentur protenus, et se Excusaturos non sollicitemus amicos. Da testem, judex quum dixerit: audeat ille, Nescio quis, pugnos qui vidit, dicere, Vidi? Et credam dignum barbâ, dignumque capillis Majorum. Citiùs falsum producere testem Contra paganum possis, quàm vera loquentem Contra fortunam armati, contraque pudorem. Præmia nunc alia, atque alia emolumenta notemus Sacramentorum. Convallem ruris aviti Improbus, aut campum mihi si vicinus ademit Et sacrum effodit medio de limite saxum, Quod mea cum vetulo coluit puls annua libo; Debitor aut sumptos pergit non reddere nummos, Vana supervacui dicens chirographa ligni: Exspectandus erit, qui lites inchoet, annus Totius populi: sed tunc quoque mille ferenda Tædia, mille moræ ; toties subsellia tantùm Sternuntur ; jam facundo ponente lacernas Cædicio, et Fusco jam micturiente, parati Digredimur, lentâque fori pugnamus arenâ.
Ast illis, quos arma tegunt, et balteus ambit, Quod placitum est ipsis, præstatur tempus agendi, Nec res atteritur longo sufflamine litis.
Solis præterea testandi militibus jus,
Vivo patre, datur: nam, quæ sunt parta labore
Militiæ, placuit non esse in corpore censûs,
Omne tenet cujus regimen pater. Ergò Coranum,
Signorum comitem, castrorumque æra merentem,
Quamvis jam tremulus, captat pater. Hunc labor æquus
Provehit, et pulchro reddit sua dona labori.
Ipsius certè ducis hoc referre videtur,
Ut, qui fortis erit, sit felicissimus idem, Ut læti phaleris omnes, et torquibus omnes.
« PredošláPokračovať » |