These wild-wood flowers, I've pu'd, to dech
That spotless breast o' thine:
The courtier's gems may witness love—
But 'tis na love like mine.
O BONIE was yon rosy brier,
That blooms sae far frae haunt o' man;
And bonie she, and ah, how dear!
It shaded frae the e'enin sun.
Yon rose buds in the morning dew,
How pure amang the leaves sae green;
But purer was the lover's vow
They witness'd in their shade yestreen.
All in its rude and prickly bower,
That crimson rose how sweet and fair!
But love is far a sweeter flower
Amid life's thorny path o' care.
The pathless wild, and wimpling burn,
Wi' Chloris in my arms, be mine;
And I the world, nor wish, nor scorn,
Its joys and griefs alike resign,
LASSIE WI' THE LINT-WHITE LOCKS.
Tune-"Rothemurche's Rant."
LASSIE wi' the lint-white locks,
Bonie lassie, artless lassie,
Wilt thou wi' me tent the flocks,
Wilt thou be my dearie O?
Now nature cleeds the flowery lea,
And a' is young and sweet like thee;
O wilt thou share its joys wi' me,
And say thou'lt be my dearie O?
Lassie, &c.
And when the welcome simmer-shower
Has cheer'd ilk drooping little flower,
We'll to the breathing woodbine bower
At sultry noon, my dearie O.
Lassie, &c.
When Cynthia lights, wi' silver ray,
The weary shearer's hameward way;
Thro' yellow waving fields we'll stray,
And talk o' love, my dearie 0.
Lassie, &c.
And when the howling wint'ry blast
Disturbs my lassie's midnight rest,
Enclasped to my faithfu' breast,
I'll comfort thee, my dearie O.
Lassie, &c.
THIS IS NO MY AIN LASSIE.
Tune-"This is no my ain House."
O THIS is no my ain lassie,
Fair tho' the lassie be;
O weel ken I my ain lassie
Kind love is in her e'e.
I see a form, I see a face,
Ye weel may wi' the fairest place:
It warts, to me, the witching grace,
The kind love that's in her e'e.
O this, &c.
She's bonie, blooming, straight, and tall,
And lang has had my heart in thrall;
And ay it charms my very saul,
The kind love that's in her e'e.
O this, &c.
A thief sae pawkie is my Jean,
To steal a blink, by a' unseen;
But gleg as light are lovers' een,
When kind love is in the e'e.
O this, &c.
It may escape the courtly sparks,
It may escape the learned clerks;
But weel the watching lover marks
The kind love that's in her e'e.
O this, &c.
T'une "Here's a health to them that's awa, hiney."
HERE'S a health to ane I lo'e dear,
Here's a health to ane I lo'e dear;
Thou art sweet as the smile when fond lovers meet,
And soft as their parting tear-Jessy!
Altho' thou maun never be mine,
Altho' even hope is denied;
'Tis sweeter for thee despairing,
Than aught in the world beside-Jessy!
Here's, &c.
I mourn thro' the gay, gaudy day,
As hopeless I muse on thy charms;
But welcome the dream o' sweet slumber,
For then I am lockt in thy arms-Jessy!
Here's, &c.
I guess by the dear angel smile,
I guess by the love-rolling e'e;
But why urge the tender confession
'Gainst Fortune's fell cruel decree-Jessy'
Here's, &c.
BONIE lassie, will ye go, will ye go, will ye go, Bonie lassie, will you go to the birks of Aberfeldy!
Now simmer blinks on flowery braes,
And o'er the crystal streamlet plays,
Come let us spend the lightsome days
In the birks of Aberfeldy.
While o'er their heads the hazels hing,
The little birdies blithely sing,
Or lightly flit on wanton wing
In the birks of Aberfeldy.
Bonie lassie, &c.
The braes ascend like lofty wa's,
The foaming stream deep-roaring fa's,
O'er-hung wi' fragment spreading shaws,
The birks of Aberfeldy.
The hoary cliffs are crown'd wi' flowers,
White o'er the linns the burnie pours,
And rising weets wi' misty showers
The birks of Aberfeldy.
|