Obrázky na stránke
PDF
ePub
[merged small][ocr errors]

PRÆFATIO

EDITORUM.

mmmm

QUUM Horatii altera editio Bipontina, juxta veteres libros emendata, penitus exhausta fuisset, adnotationibusque et indice prorsus careret, eam ad editiones postreme seu optime exactas, Codicibus MSS. quum usus posceret consultis, recensendi de novo et explendi, consilium cepimus.

Ideo, Litterarum humaniorum studioso viro, J.-B.-M. GENCE, qui Librum de Imitatione Christi, pro Collectione nostra vere classicum, Latine edidit ut Gallice interpretatus est, Horatianæ nostræ editioni parandæ operam præcipuam commisimus.

Hic Odarum recensionem, secundis curis ab erudito amico illius inceptam, variis Codicum vel Editionum Argentor. Paris. Roman. et Londin. lectionibus collatis perfecit; et textum passim, adnotationibus historicis et criticis brevibus adspersit.

Eundem omnino laborem in Epodon, Sermonum et Epistolarum libris suscepit.

Verum, eo quod non tam ad tirones quam ad excultos juvenes vel ætate maturos spectârint editiones Bipontinæ, haud multas adnotationes, nisi interpretationis causa nominum ad Indicem remissorum, textui subjunxit; in Odis nimirum pauciora, sed in Sermonibus et potissimum in Epistolis plura, quanquam parce semper, animadvertit.

Cæteroquin, cum Edd. et Commentariis vetust. et cum Edd. vulgatioribus cujusque regionis, Bipontinam Editionem conferendo, non ab ea recedere debuit, nisi sensus dilucidatione majori, ut congrua magis lectione, ad id cogeretur, mutationibus sæpe temerariis textus editi cautissime utendo.

Sic adnotationibus sobrie, variisque lectionibus apte subjunctis, nedum fusa et gravi commentatione scholiisve numerosis additis, sollicitum aut nimis intentum lectorem tenentibus, gratum et utile magis duximus nomina quæque historicarum, mythologicarum et geographicarum rerum, adjunctis earum circumstantiis, in Indice ampliori, verbis iisdem Horatii simul collectis, explananda esse.

Tanta enim apud nostrum vatem horum nominum necnon aliorum ad ea spectantium exstat copia, ut in interpretatione quorumque, loca sese mutuo juvare animadversum sit. Unde hic vere fiet Index Horatianus, periphrasi varia vocibus sparsis coeuntibus effecta, nominum diversorum interpres.

Interpunctione textus sæpe incerta ex MSS. exstante, in graves aliquando errores lapsi fuerunt editores : interpretatio anceps, ad rationis criticæ lucem, ex optimis lectionibus ducenda erat.

Argumenta etiam Sermonum ac Epistolarum et quandoque Odarum, subjecto non semper ab illis aptata, historicæ rei et materiæ textus accommodari, et contractiori modo describi debuere.

Vitæ Horatii Suetonio tributæ, quædam acta ex aliis exemplaribus vetustis inserta fuere, annis ævi minus incertis ad notitiam de ætate, et ad ipsa Horatii scripta adjunctis.

Notitiam tandem litterariam de auctoris operibus, de scholiis et commentariis, ipsamque de libris impressis, quam editores ut copiosiorem vel in Europæis versionibus, extulere, generatim servari curavimus, in proœmiis tantum quædam supervacanea recidendo, laxiora restringendo, vel in meliorem ordinem referendo: at cæterum,

compleri passim, et molem editionum majorem in sex ætates dividi, eclecticam nempe a litigiosa ætate secerni, utile putavimus.

Editioni Horatianæ providam sic operam dando, liberiora nonnulla loca, quæ, vel similia, occurrunt apud vates ejusdem ævi candidissimos, num expungenda erant, quum non adeo rudes junioresve lectores respeximus ; et infirmitatibus humanis cæterum indulgentes, ad Ethnicum vatem iis vi majore obnoxium attendimus! qui tamen demum Philosophiæ Platonicæ vel Stoicæ in provecta ætate totus, ait (Epist. 1):

QUID VERUM ATQUE DECENS CURO..... ET OMNIS IN HOC SUM...

ET MIHI RES, NON ME REBUS, SUBMITTERE Conor.

« PredošláPokračovať »