« PredošláPokračovať »
fend yt William Whalley has yll dispossid cheldyr of brekynge of heghis, wharfor we amercy hym for yt yt is done, iiij d., &, yf ya be fonden anny mor in defawt, we amercy hym iij s. iiij d.
. . Item we fend yt the crosse in the merkyth place is lyke to fall, and lyke, bott grace be, to myschef sume man, whar for we dysyer yt it may be mendid or anny hurt fall. Item we fend yt melners is not deligent to serve the Lorde's tennandes be for owte men, whar for we dyseyer the Lorde's offecer gyff warnynge to tham yt it be mendid, and also yt ya take mesurabyll multure of men's corne, for ther is diverse men yt complens of tham, wharfor we amercy tham nowe at this tym for defawt yt is maid ij s., ande eftyr, & thay ar fonden defectyffe, to forfyt xx s. Item we well yt yff it may be fonden be the offecer or be anny oyere man yt anny bocher yt slays flech kep anny ower Thorsday yt was sclayn of Setterday afor, bot yf it be powderd, from May day to Makylmes day, to forfyt the flech, & xxtid. to the Lord. Item we desyer yt the offecers, yt ya make a dew serche wekly of the syss of bred & all, for pur pepell yt lyffhis of the penny complens tham grettly yt the sys is not kepid. Item we well yt our butes in the Owt wod be maid be the tonchype of Selby, be maid be Wetsonday next comynge, opan of vj s. viij d. Item we fend a gret defawt yt in Owsgat the ground gos away, and lyke in prosisse of tym, wt owt yt it be amendyd, is lyke to mescheffe all the gates of Owsgate, & all the howynge yt bondys of the watter; whar for we desyer yt my Lord & his breyer lye ther hedes togeder, yt ther may be fonden a remdy ther fore, ar it be wars. Item we desyer yt my Lord and his breyer wald gyff us tymber, yt we may mayke a comyne seghe, yt the pepyll may be eassid, for the comyns gretly grughis ther wythe yt ther is non as ther was wont to be. Item yt evere mane clens his gutters againe the payment for uschuynge of the water for drownnynge of payment be Whetsonday, yen evere pec iiij d.
Apr., 16th Hen. VII. (1501).—Robertus Michall (viij d.) of the Cowleyne, berker, has sawed okes in the Northwoddes of my Lord Abbot of Selby by diverse tymes, and has levetakyn, and his ax has bene takyn frome hym, and will noo mend, and if ye xii men will amercy hym accordyng to the trespas my Lord is content, and if ye will not, my said Lord will take a remyde as the lawe will, and, as oftyme as he is takyn, he shall forfet vj s. viij d. Item Collyng, the shomaker, (vj d.) has trespast is in the same forme. Item John Shepherd (ij d.) and John Ternour (viij d.) has felled hollynnes and okewod in the said Northwoddes, and ofest tymes as he is takyn he shall forfet xij d. Thomas Ternour, son of Richard Ternour, has pylled hollynnes in diverse places, and cutt esshwod by divers tymes, to the gret hurt of the said Lord, and, as oftymes as he makys any more fawtez he shall forfett vj s. viijd.
April, 18th Hen. VII. (1503). --Also the w'in wrytten Jur’ar fully agreede, and be thadvyse of Thomas Elles esquier, deputie to Sir Thomas Darcy knyght, and also by James Duffeld, clerke of the courte, & William Hagthorpe, balyff of Selby, in the fourme ensuynge; that Johne Mitteley & his heires frome nowforthe shall wall up & make close sufficiently the utter west syde of his swynstye toward the tenement of John Goldall, so that no fylth, nor corrupion, or dunge, come nor discend from the same swynstye into the grounde of the said John Goldall, excepte yt it be by sipynge, or casualtie, butt to lay the dunge, owder in the gate, or eles wtin his owne grounde, so that yat it anoye not the same John Goldall, nor his heirz, nor the holders of the same tenemente; and the same John Miteley shall gar mayke a litill gutter win his own grounde doune to the pale, benethe the same swynsty, and a grate win ij fete of the same pale, so that the fylthe & juse that discendes & comez frome the sade stye maye go doune yoll way, & thrugh the pale, & so to the dame in the gutter toward the said John Goldall . grounde. And as for rayne watter or oyer causett weetes when they com to go & discende, what way they will, of to grounde or of toyer. And for the eves droppes, and oyer easementes, for reparacionz, when neide requierethe, ayer of thame to have & take ease of oyer accordyng to olde neghburode & gude custome, wt oute grugyng of ayer party after this courte ; & her uppon, in the presens of all the hole inquest, & many oyer,
the said John Goldall & John Mitteley in the highe chirche of Selby war fully accordytt, & frendely ayer toke oyer be the handes.
21 Hen. VII. (1505 ?).—The answher of William Roper & Jhane his wyfe ayenste Robert Calthorne.
Be it knaweyn y Robert Cauthorne of Selby sent for Wylliam Ropper and hys wyff to cum to hym, and ev' they wald speyk wt hym, for he is so sore takyng, and that tyme that he sente for hus was thys tym ij yer; and he schewyd hus that he had spokyn wt John Cauthorn, dyssyryng hym to be hys sektur, and also me to be hys sekture to; and then he answerd me and sayd, “Thys hys not the matter yt I send for yow, for it is so yt yowr wyff hays had hyll wordes for me, qwylk yt I was never worde off; and, qwheyr yt I can not restore hyr in to hyr gud naym agayn, I be seyk yow, latt me gyff hyr sum off my gudes.' And more over I askyd hym qwat gudes it schnld be, and then he schuyd un to me ande my wyff agayn yt it schuld be hys wyff beltte and hyr beydes, excep the rynges and the jewelles yt was att thaym, be syd his testament, and I gaff hym leyff to gyff my wyff thaym, and my wyff leyff to tak thaym, not off no condecion but frely gyffyn for ever mor, excep schew schuld not weyr thaym in Selby not hys lyff; and then he wald have gyffyn thaym un to hus at hevyn, and we wald not tak thaym yt nyght; and then we sayd, and he walde be the saym man att morne as he hys at hevyn, we wald tayk thaym; and then at morne he sent for hus wt hys maydyn, and my wyff went and fecchyd thaym, and he delyveryd thaym wt his awn handes unto me wyff, frely gyffyn for ever more; and thys wyll we mak gud os trew kyrsyn folk schuld doo, and frely gyffyn, wtowt any codicion.
April, 10th Henry VIII. (1519).—The grett Inquest charges and commandes all wattersewers and the dyssendis yer off, off bothe sydys the town, be dykid and scoried be Withesonday, sub pæna, evere roode, ij d. Item yt the mylners grounde my Lord Abbott & his tennantez off Selby afore any owte folkes. Item that no veteller, nor other man, herber no begers nor vacabundys in thayr howsses. Item yt the swyn be rynged be Saynt Elene day, excepe sewes w piges. Item yt no man nor woman latt no manservauntes dysse nor carde in ther howsses at unconvenyaunte tym off the nyght. Item yt noo wode kyeper take no swyn into the woddys for akecornes. Item yt the buttys be mayde be Withesonday. Item that no man scaste no caryon in the newe layn, ne in no nother commen waye wher the kynge's pepill passes. Item that no man by no corn to the bell be gon aboght the town. Item yt the botchers kype well and honestly thayr bowlels and blode. Item that no man nor woman ber no wood from no woddes of my Lordy's Abbott. Item that no man kype no mor curres in his hows butt oon. Item that the swyn be keped in thayr styes on the nyght. Item that no man caste no caryon in the dam. Item yt no man fyshe nor fewle in the dam. Item yt no man dry hempe in thayr howsses. Item that baxters make gude and able brede for manne's body after the price off the corn. Item that the brewsters sell a gallon of her best hale for jd. ob. the gallon. Item that the brewsters lett power people have a halpynworthe off hale for a halpyney. Item that the gutters be kyeped well & honestly. Item that fyshers off thys town of Selby lett my Lord Abbott and the inhabytors of Selby shuche fyshe as God sendys thaym. Item that all fenses, betwyc nyghtbur and nyghtbur, be mayd be Saynt Elene day. Item that the barkers barks well thayr ledder. Item that the shounemaker sewe well thayre shown. Item that the gloveres sew well thayr glovys. Item that Symond Ray de Braton take of his catell off our commen off Selby be Saynte Elene day. Item that no man or woman breke no heges, nor bere no wood, sub poena xl s., as oftymes as thay er takyn. Item that no man kepe no hown, grewand, nor spanzell for distowrbyng of my Lord game.
Item that no man hawke nor hunte wtin my Lorde's warraunte. Item all fennces buttyng on the kynge's strett be mayd be Saynt George day. Item that no man cr woman dry no hempe in the dame, nor in the lendynges goynge to the dame.
Item that James Smythe make his fence betwyn hym & Nycoles Raghtton be Saynt Elene day. Item that no man lett no bitchis un salte go aboght in the town, but bynd thaym up. Item that no man nor woman reboke the whest. Item that no man nor woman lett thayr swyn com in the churche yerde.
MERCYMENTES.-Item a watter sewe off Ric' Shippyn, nott don, xij d. Item a watter sew off John Olyve, nott doon, viij d. Item Symond Ray de Braton, for ettynge the commen, xij d.
Item John Freman mayd affray of Thos Pynner, xl d. Item John Freeman, for takynge viij swyn to giste, xij d. Item Nycolson wyff, for sellynge ale for ij d. the gallon, ijs. Item Ric' Marshall wyff, yt wold nott lett
. powr folkys have bale, iiij d. Item Hew Yeuan de Ricall, for sellyng messell porke, xx d. Item Pey de Cauwod, for sellynge messell porke, xx d.
Also yff itt plese my Lord off his Lordshipe and his Consell to lett us have owre closses for the space off iij yer, for the wele off the town, and the fennces, and for to have iiij
to gether itt att Lammes, ij men in Gouthorpe & ij men in Mekylgate, Raunald Flemynge & John Peryshe for Gouthorpe, for Mekylgate Thomas Cowper & Thomas Strynger. Item Herpam in the Newe layn to be the hirde for to keype
Item William Toller & Christofer Gud for stellyng a jerkynge.
Oct., 25th Hen. VIII. (1533).—The grete Inquest chargith & commandith that no man shall sew an oyer at the coñen be ... (common bench), except his det or trespas be xl s. or above. That no man, ne oyer person, caste eny carryon in the dam. That none frome hensfurth fyshe ne fewle in the dame, ne in the lordeship & liberties of Selby, ne hunt wtoute licence of my Lorde Abbot of Selby. That none wtin libertiez of Selby kepe neyther hownde, spangell, ne grewend, frome hensfurth, except he may spende xl s. annuatim. That no man shall forstall, ne