AUCTORE BENJAMINE BRIGHAM.
"Quò fugis, Ah! miseram, demens Proserpina, matrem ?
Heu! nunquamne licet te rursus visere? nunquam
Maternis dabitur natam complectier ulnis?
Te magno frustrà clamavi pressa dolore:
Te frustra repetens, lustravi devia montis :
Claris te facibus cæcæ per tempora noctis,
Te, dum saxa volant ruptis e faucibus Ætnæ,
Nunquam cessavi dilectam quærere raptam!
O utinam liceat mihi te, carissima, rursus
Aspicere his oculis, visuque levare dolorem!"—
Fundenti passis has crinibus ore querelas,
Fulgens in summâ Cyanes jam cernitur undâ
Zona, auro latè distincta, et splendida gemmis;
Quâ solita est olim semper Proserpina cingi,
Cùm campis Siculis, magnâ stipante catervâ,
Floribus implebat calathos, gremiove ferebat,
Aut variis ibat sertis ornata capillos.
Nescia quid timeat, "Ditem nunc," inquit," adibo,
Acciderit proli si quis mihi casus amatæ”.
Plura locuturæ vox nunc pervenit ad aures,
"Diva Ceres, O siste gradum, te cuncta docebo"-
Hisque Arethusa Deam compellat vocibus ultro;
"Diva Ceres, lætis oneras quæ frugibus arva,
Cinctaque per campos incedis tempora spicis,