Aequali recreat sorte vicarius.

Illic matre carentibus

Privignis mulier temperat innocens;
Nec dotata regit virum

Conjux, nec nitido fidit adultero:
Dos est magna parentium

Virtus, et metuens alterius viri
Certo foedere castitas,

Et peccare nefas, aut pretium emori.
O quisquis volet impias
Cædes, et rabiem tollere civicam,
Si quæret pater urbium

Subscribi statuis, indomitam audeat
Refrænare licentiam,

Clarus postgenitis: quatenus, heu nefas!
Virtutem incolumem odimus,
Sublatam ex oculis quærimus, invidi.
Quid tristes querimoniæ,

Si non supplicio culpa reciditur?

Quid leges, sine moribus

Vanæ, proficiunt? si neque fervidis

Pars inclusa caloribus

Mundi, nec Boreæ finitimum latus,
Duratæque solo nives,

Mercatorem abigunt ? horrida callidi

Vincunt æquora navitæ ?

Magnum pauperies opprobrium jubet
Quidvis et facere et pati,

Virtutisque viam deserere ardua?
Vel nos in Capitolium,

Quò clamor vocat et turba faventium,
Vel nos in mare proximum

Gemmas, et lapides, aurum et inutile,
Summi materiam mali,

Mittamus, scelerum bene pœnitet.
Eradenda cupidinis

Pravi sunt elementa; et teneræ nimis
Mentes asperioribus

Formandæ studiis. Nescit equo rudis
Hærere ingenuus puer,

Venarique timet; ludere doctior,

Seu Græco jubeas trocho,

Seu malis vetitâ legibus aleâ :

Quum perjura patris fides

Consortem socium fallat et hospitem,
Indignoque pecuniam

Hæredi properet. Scilicet improba

Crescunt divitiæ: tamen

Curta nescio quid semper abest rei.

ODE XXV.

AD BACCHUM.

Quò me, Bacche, rapis tui

Plenum? Quæ nemora, quos agor in specus, Velox mente nová? Quibus

Antris egregii Cæsaris audiar

Aeternum meditans decus

Stellis inserere et consilio Jovis?

Dicam insigne, recens, adhuc

Indictum ore alio. Non secus in jugis
Exsomnis stupet Evias,

Hebrum prospiciens, et nive candidam
Thracen, ac pede barbaro

Lustratam Rhodopen. Ut mihi devio
Ripas et vacuum nemus

Mirari libet ! O Naïadum potens,

Baccharumque valentium

Proceras manibus vertere fraxinos!

Nil parvum, aut humili modo, Nil mortale loquar. Dulce periculum, O Lenæe, sequi Deum

Cingentem viridi tempora pampino!

ODE XXVI.

AD VENEREM.

VIXI puellis nuper idoneus,

Et militavi non sine gloriâ:
Nunc arma defunctumque bello
Barbiton hic paries habebit,

Lævum marinæ qui Veneris latus
Custodit. Hic, hîc ponite lucida
Funalia et vectes et arcus
Oppositis foribus minaces.

O quæ beatam, Diva, tenes Cyprum, et Memphin carentem Sythoniâ nive, Regina, sublimi flagello

Tange Chloën semel arrogantem.

IMPIOS

ODE XXVII.

AD GALATEAM.

MPIOs parræ recinentis omen

Ducat, et prægnans canis, aut ab agro

Rava decurrens lupa lanuvino,

Fetaque vulpes:

Rumpat et serpens iter institutum,
Si per obliquum similis sagittæ
Terruit mannos. Ego cui timebo,
Providus auspex,

Antequam stantes repetat paludes
Imbrium divina avis imminentum,
Oscinem corvum prece suscitabo
Solis ab ortu.

Sis licet felix ubicumque mavis,
Et memor nostri, Galatea, vivas:
Teque nec lævus vetet ire picus,
Nec vaga cornix.

Sed vides quanto trepidet tumultu
Pronus Orion. Ego quid sit ater
Hadriæ novi sinus et quid albus
Peccet lapyx.

Hostium uxores puerique cæcos Sentiant motus orientis austri, et Aequoris nigri fremitum, et trementes Verbere ripas!

Sic et Europe niveum doloso
Credidit tauro latus, et scatentem
Belluis pontum, mediasque fraudes
Palluit audax.

Nuper in pratis studiosa florum, et
Debitæ Nymphis opifex coronæ,
Nocte sublustri nihil astra præter
Vidit et undas.

Quæ simul centum tetigit potentem
Oppidis Creten, pater, o relictum

Filiæ nomen, pietasque, dixit,
Victa furore!

Unde? quò veni? Levis una mors est Virginum culpæ. Vigilansne ploro Turpe commissum? an vitiis carentem Ludit imago

Vana, quæ portâ fugiens eburnâ
Somnium ducit? Meliùsne fluctus
Ire per longos fuit, an recentes
Carpere flores?

Si quis infamem mihi nunc juvencum Dedat iratæ! lacerare ferro, et Frangere enitar modò multùm amati Cornua monstri.

Impudens liqui patrios Penates: Impudens Orcum moror! O Deorum Si quis hæc audis, utinam inter errem Nuda leones!

Antequam turpis macies decentes
Occupet malas, teneræque succus
Defluat prædæ, speciosa quæro
Pascere tigres.

Vilis Europe, pater urget absens: Quid mori cessas? Potes hâc ab orno Pendulum zonâ bene te sequutâ Lædere collum.

Sive te rupes et acuta leto

Saxa delectant, age, te procellæ

Crede veloci: nisi herile mavis

Carpere pensum,