Perfidus, et nigri patietur carceris uncum, Aut maris Ægæi rupem, scopulosque frequentes Exsulibus magnis. Pœnâ gaudebis amarâ Nominis invisi, tandemque fatebere lætus,
Nec surdum nec Tiresiam quenquam esse deorum.
PLURIMA sunt, Fuscine, et famâ digna sinistrâ, Et nitidis maculam hæsuram figentia rebus, Quæ monstrant ipsi pueris traduntque parentes. Si damnosa senem juvat alea, ludit et hæres Bullatus, parvoque eadem movet arma fritillo. Nec melius de se cuiquam sperare propinquo Concedet juvenis, qui radere tubera terræ, Boletum condire, et eodem jure natantes Mergere ficedulas didicit, nebulone parente,
Et canâ monstrante gulâ. Quum septimus annus
Transierit puero, nondum omni dente renato,
Barbatos licèt admoveas mille inde magistros, Hinc totidem, cupiet lauto cœnare paratu Semper, et a magnâ non degenerare culinâ. Mitem animum et mores modicis erroribus æquos Præcipit, atque animas servorum et corpora nostrâ Materiâ constare putat paribusque elementis; An sævire docet Rutilus, qui gaudet acerbo Plagarum strepitu, et nullam Sirena flagellis Comparat, Antiphates trepidi laris, ac Polyphemus, Tum felix, quoties aliquis tortore vocato Uritur ardenti duo propter lintea ferro? Quid suadet juveni lætus stridore catenæ, Quem mirè afficiunt inscripta ergastula, carcer Rusticus? Exspectas, ut non sit adultera Largæ Filia, quæ nunquam maternos dicere machos Tam citò, nec tanto poterit contexere cursu,
Ut non ter decies respiret? Conscia matri Virgo fuit: ceras nunc hâc dictante pusillas Implet, et ad mochos dat eisdem ferre cinædis. Sic natura jubet : velociùs et citiùs nos Corrumpunt vitiorum exempla domestica, magnis Quum subeunt animos auctoribus. Unus et alter Forsitan hæc spernant juvenes, quibus arte benignâ
Et meliore luto finxit præcordia Titan :
Sed reliquos fugienda patrum vestigia ducunt, Et monstrata diù veteris trahit orbita culpæ. Abstineas igitur damnandis: hujus enim vel Una potens ratio est, ne crimina nostra sequantur Ex nobis geniti; quoniam dociles imitandis Turpibus ac pravis omnes sumus; et Catilinam Quocunque in populo videas, quocunque sub axe: Sed nec Brutus erit, Bruti nec avunculus usquam. Nil dictu fœdum visuque hæc limina tangat,
Intra quæ puer est. Procul hinc, procul inde puellæ Lenonum, et cantus pernoctantis parasiti.
Maxima debetur puero reverentia. Si quid
Turpe paras, ne tu pueri contempseris annos :
Sed peccaturo obstet tibi filius infans.
Nam si quid dignum Censoris fecerit irâ
Quandoque, et similem tibi se non corpore tantùm
Nec vultu dederit, morum quoque filius, et qui Omnia deteriùs tua per vestigia peccet, Corripies nimirum et castigabis acerbo
Clamore, ac post hæc tabulas mutare parabis.
Unde tibi frontem libertatemque parentis,
Quum facias pejora senex, vacuumque cerebro
Jam pridem caput hoc ventosa cucurbita quærat ? Hospite venturo, cessabit nemo tuorum.
Verre pavimentum, nitidas ostende columnas, Arida cum totâ descendat aranea telâ ; Hic leve argentum, vasa aspera tergeat alter; Vox domini furit instantis, virgamque tenentis. Ergò miser trepidas, ne stercore fœda canino Atria displiceant oculis venientis amici, Ne perfusa luto sit porticus; et tamen uno Semodio scobis hæc emendat servulus unus.
Illud non agitas, ut sanctam filius omni
Adspiciat sine labe domum, vitioque carentem?
Gratum est, quòd patriæ civem populoque dedişti, Si facis, ut patriæ sit idoneus, utilis agris,
Utilis et bellorum et pacis rebus agendis.
Plurimùm enim intererit, quibus artibus, et quibus hunc tu Moribus instituas. Serpente ciconia pullos Nutrit, et inventâ per devia rura lacertâ: Illi eadem sumptis quærunt animalia pinnis. Vultur, jumento et canibus crucibusque relictis, Ad fœtus properat, partemque cadaveris affert..
Hic est ergò cibus magni quoque vulturis, et se Pascentis, propriâ quum jam facit arbore nidos. Sed leporem aut capream famulæ Jovis et generosa In saltu venantur aves: hinc præda cubili Ponitur inde autem, quum se matura levârit Progenies, stimulante fame, festinat ad illam, Quam primùm prædam rupto gustaverat ovo. Edificator erat Cetronius, et modò curvo Littore Cajeta, summâ nunc Tiburis arce, Nunc Prænestinis in montibus, alta parabat Culmina villarum, Græcis longèque petitis Marmoribus, vincens Fortunæ atque Herculis ædem, Ut spado vincebat Capitolia nostra Posides.
Dum sic ergò habitat Cetronius, imminuit rem, Fregit opes; nec parva tamen mensura relicta Partis erat totam hanc turbavit filius amens, Dum mcliore novas attollit marmore villas.
Quidam sortiti metuentem sabbata patrem, Nil præter nubes et cœli numen adorant; Nec distare putant humanâ carne suillam, Quâ pater abstinuit; mox et præputia ponunt: Romanas autem soliti contemnere leges Judaïcum ediscunt, et servant, ac metuunt jus, Tradidit arcano quodcunque volumine Moses. Non monstrare vias, eadem nisi sacra colenti ; Quæsitum ad fontem solos deducere verpos. Sed pater in causâ, cui septima quæque fuit lux Ignava et partem vitæ non attigit ullam.
Sponte tamen juvenes imitantur cætera: solam Inviti quoque avaritiam exercere jubentur. Fallit enim vitium specie virtutis et umbrâ,
Quum sit triste habitu vultuque et veste severum.
Nec dubiè, tanquam frugi, laudatur avarus,
Tanquam parcus homo, et rerum tutela suarum
Certa magis, quàm si fortunas servet easdem
Hesperidum serpens aut Ponticus. Adde quòd hunc, de Quo loquor, egregium populus putat acquirendi Artificem quippe his crescunt patrimonia fabris.
Sed crescunt quocunque modo, majoraque fiunt Incude assiduâ, semperque ardente camino. Et pater ergò animi felices credit avaros, Qui miratur opes, qui nulla exempla beati Pauperis esse putat juvenes hortatur, ut illam Ire viam pergant, et eidem incumbere sectæ.
Sunt quædam vitiorum elementa: his protenus illos Imbuit, et cogit minimas ediscere sordes. Mox acquirendi docet insatiabile votum. Servorum ventres modio castigat iniquo,
Ipse quoque esuriens: neque enim omnia sustinet unquam Mucida cærulei panis consumere frusta,
Hesternum solitus medio servare minutal
Septembri: nec non differre in tempora cœnæ Alterius conchem æstivam cum parte lacerti Signatam, vel dimidio putrique siluro,
Filaque sectivi numerata includere porri.
Invitatus ad hæc aliquis de ponte negabit.
Sed quò divitias hæc per tormenta coactas,
Quum furor haud dubius, quum sit manifesta phrenesis,
Ut locuples moriaris, egentis vivere fato?
Interea pleno quum turget sacculus ore,
Crescit amor nummi, quantùm ipsa pecunia crevit;
Et minùs hanc optat, qui non habet. Ergò paratur
Altera villa tibi, quum rus non sufficit unum,
Et proferre libet fines; majorque videtur
Et melior vicina seges: mercaris et hanc, et Arbusta, et densâ montem qui canet olivâ. Quorum si pretio dominus non vincitur ullo, Nocte boves macri, lassoque famelica collo Jumenta ad virides hujus mittentur aristas; Nec priùs inde domum, quàm tota novalia sævos In ventres abeant, ut credas falcibus actum.
Dicere vix possis, quàm multi talia plorent,
Et quot venales injuria fecerit agros.
Sed qui sermones? quàm fœdæ buccina famæ ?
Quid nocet hoc? inquit. Tunicam mihi malo lupini,
Quàm si me toto laudet vicinia pago,
Exigui ruris paucissima farra secantem.
Scilicet et morbis et debilitate carebis,
Et luctum et curam effugies, et tempora vitæ
Longa tibi post hæc fato meliore dabuntur,
Si tantum culti solus possederis agri,
Nullis visa unquam meritis minor, aut ingratæ Curta fides patriæ. Saturabat glebula talis
Patrem ipsum, turbamque casa, quâ fœta jacebat Uxor, et infantes ludebant quatuor, unus Vernula, tres domini: sed magnis fratribus horum, A scrobe vel sulco redeuntibus, altera cœna Amplior et grandes fumabant pultibus ollæ. Nunc modus hic agri nostro non sufficit horto. Indè ferè scelerum causæ, nec plura venena Miscuit, aut ferro grassatur sæpiùs ullum Humanæ mentis vitium, quàm sæva cupido Indomiti censûs: nam dives qui fieri vult,
Et citò vult fieri. Sed quæ reverentia legum,
Quis metus aut pudor est unquam properantis avari? Vivice contenti casulis et collibus istis,
O pueri, Marsus dicebat et Hernicus olim
Vestinusque senex; panem quæramus aratro,
Qui satis est mensis: laudant hoc numina ruris, Quorum ope et auxilio, gratæ post munus aristæ, Contingunt homini veteris fastidia quercûs. Nil vetitum fecisse volet, quem non pudet alto Per glaciem perone tegi; qui submovet Euros Pellibus inversis. Peregrina ignotaque nobis
Ad scelus atque nefas, quæcunque est, purpura ducit. Hæc illi veteres præcepta minoribus: at nunc
Post finem autumni mediâ de nocte supinum Clamosus juvenem pater excitat: Accipe ceras Scribe, puer, vigila, causas age, perlege rubras Majorum leges, aut vitem posce libello. Sed caput intactum buxo naresque pilosas Annotet, et grandes miretur Lælius alas. Dirue Maurorum attegias, castella Brigantûm, Ut locupletem aquilam tibi sexagesimus annus Afferat; aut, longos castrorum ferre labores
Si piget et trepidum solvunt tibi cornua ventrem Cum lituis audita, pares, quod vendere possis Pluris dimidio, nec te fastidia mercis
Ullius subeant ablegandæ Tiberim ultra :
Neu credas ponendum aliquid discriminis inter
Unguenta, et corium. Lucri bonus est odor ex re Qualibet. Illa tuo sententia semper in ore Versetur, dîs atque ipso Jove digna, poëtæ : Unde habeas, quærit nemo; sed oportet habere. Hoc monstrant vetulæ pueris repentibus assæ : Hoc discunt omnes ante alpha et beta puellæ. Talibus instantem monitis quemcunque parentem
« PredošláPokračovať » |